Weliye Hediki u Ez Qelbinij

Yew wexto xerîb bi. Memleket newe herb ra vejeybî. Şêx Seîd zî verî hukumatî variştibi û dewon ra geyraynî ki dewîjî ardimî jey bikî. Verî ki şîro Pîron, ay rojî zî, o û murîdî xu hameynî dewa Dêrey. Dêrey, Qelbîn ra hîri kîlometrey durî bi. Wexton ra, şeşî aşma dîyini, serra hanzar û noysey û vîst û panj bi. Wextono ki, Şêx Seîd û murîdî xu yenî Dêrey, Welî wazeno şîro jey veyno. O û di inbazî xu, wardenî rar kewnî. Ê ki yenî Dêrey, mêrdimî Şêxî pey hesînî û şonî tera vonî, hal mesela Welî ha murîdon mîyan di. Weyra, Şêx jîn ra vono şîrî jey bîyarî mi heti. Şêx û Welî, yewbînan ewilî nidîybi, feqet Şêx vengî Welî eşnawitbi û semedî ineway ra waştinî ki Welî jey reydi şîro heyonî Pîron.